Абласны конкурс рытарычнага майстэрства “Гавары са мной па-беларуску”
Абласны конкурс рытарычнага майстэрства “Гавары са мной па-беларуску” сярод вучняў IX – XI класаў устаноў агульнай сярэдняй адукацыі праведзены на Гомельшчыне 7 снежня 2019 года.
Арганізатарамі конкурсу з’яўляліся галоўнае ўпраўленне адукацыі Гомельскага абласнога выканаўчага камітэта, дзяржаўныя установы адукацыі “Гомельскі абласны інстытут развіцця адукацыі”, “Гімназія №36 г.Гомеля імя І.Мележа”. Правядзенне гэтага конкурсу стала добрай традыцыяй і сапраўдным святам для вучняў і педагогаў, якія з’яўляюцца аматарамі роднага слова.
У конкурсе прынялі ўдзел 58 навучэнцаў, 18 з якіх з’яўляюцца вучнямі IХ, па 20 – Х і ХI класаў устаноў агульнай сярэдняй адукацыі.
У склад журы для ацэньвання выступленняў былі запрошаны выкладчыкі Гомельскага дзяржаўнага ўніверсітэта імя Ф.Скарыны і трэнеры абласной каманды ўдзельнікаў заключнага этапу рэспубліканскай алімпіяды па беларускай мове і літаратуры.
У І туры журы конкурсу ацэньвала загадзя падрыхтаванае мультымедыйнае эсэ па тэмах: “Нацыянальнае беларускае адзенне” (IX клас), “Нацыянальныя беларускія стравы” (X клас), “Нацыянальны беларускі арнамент” (XI клас).
У другім туры пасля 15-мінутнай падрыхтоўкі ўдзельнікі конкурсу выказваліся на адну з дзвюх прапанаваных тэм, адказвалі на пытанні журы. Крытэрыямі ацэнкі былі вызначаны адпаведнасць выказвання абранай тэме, лагічнасць і будова выказвання, культура маўлення, тэхніка прамаўлення, эфектыўнасць маўлення.
Трэці тур “Выкажы сваю думку” праходзіў у вуснай форме. Крытэрыямі ацэнкі былі вызначаны ўменне выяўляць асноўную тэматыку i праблематыку прапанаванага верша беларускага паэта, абгрунтоўваць прачытанае, вызначаць кампазiцыю, выяўленчыя сродкі выразнасці.
26 навучэнцаў з розных раёнаў вобласці сталі пераможцамі. Сярод іх - вучаніца ХI класа ДУА "Гімназія г. Добруша" Гутарава Таццяна (настаўнік - Грыневіч Святлана Уладзіміраўна).
Віншуем пераможцаў, жадаем іх настаўнікам і бацькам далейшых поспехаў!
